اكيد دلوقتي سهرانه
شعر / احمد الزهيري
اكيد دلوقتي سهرانه
في آخر ركن في الاوضه
وطافيه النور
وقافله الاوضه بالمفتاح
وكالعاده..
ماسكه في ايدها تليفونها
وفاتحه الفيس
وبتفتش في بروفايله
وبتراجع كلام قايله
وبتراقب في بوستاته
ومين مهتم بحياته
ومين ديما يعلقله
ومين بيرد هو عليه
وبتعد القلوب الحمرا
وتتلخبط
فترجع تاني تبداء عد
يزيد قلبين❤️❤️
فتمسك قلبها بإيدها
يفوت ساعتين
ولسه هيا سرحانه
تفوق تتخض
بصوت إشعار .. وجايب رد
فاتقرا وهي مخنوقه
وبتدمع بكل هدوء
(مشاء الله عليك فعلا وبالتوفيق)
يرد عليها متشكر وكلك ذوق
فتفهم أن فيه قصه
ودي بدايات
علاقه بتتبنى لسه
وبادئه بشات
وتعرف امته انه خلاص
ويبقى حقيقه مش احساس
ساعة ما البنت دي تبطل
تعلقله قصاد الناس
فا تتأكد بإنه معاها دلوقتي
هناك عالخاص
تعليقات
إرسال تعليق