لآخر مرة
شعر / زهره مصطفى
خلى حلمك يسكن فيك
إوعاه يجافيك
اسمع صوته ..
بيشق طريق القلب النايم
يصحىَ يدندن لحن الشوق
أيوه وحشنى أسمع نفسى
بصوت مسموع
أيوه وحشنى أحكى مشاعرى
واسمع كل كلامك عنى
واسمع منك إيه جوايا ؟
إيه خلانى أبعد عنى
***
لملم حزنى
إغزل كل حروف الكلمة
حرف محبة .. وحرفين شوق
وارسم فوق الكف الفارد روحه عشانك
لمسة نبضه فى سر الليل
مشتاقة روحى تلمح صورتى
بين أحلامك
***
أيوة واحشنى
واحشنى ملامحى
بعد غروبك
أيوة واحشنى
واحشنى أشوفنى جوا عيونك
وقت ما تسرح
وقت ما تغرق وايا شرودك
بين الحرف وبين الكلمة
انت مخبى الحزن الساكن
أوى م الخوف
***
بسأل نفسي كل شوية ليه بتوحشنى
وارجع اجاوب
تانى على نفسى بصوت مخنوق
أيوة واحشنى
واحشنى أكون ........
أيوة واحشنى أعيشنى
جوا ضلوعك تانى
لآخر مرة
وابقى قصيدة
ما تعرف مووووت
***
تعليقات
إرسال تعليق