لسه فى اللى جاي سكات ؟
شعر / زهره مصطفى
لسه فى اللى جاي سكات ؟
ولا صوت القلب ناوى ع الكلام
لسه فية شوية حاجات
فاردة للدنيا جناح ..
خايفه ليه من بكرة يحزن ؟
شايفة ليه الأيام بترحل ؟
رغم إن النور شراع
فوق مراكب م الأمل
مغزول جدايل
كالسنابل
لونها لون الشمس لما تلمنا آخر النهار
بخيوط دهب
**
جوا منى طفله حلوة
شايله ضحكة
لفرحة هلة
والهلال هو اللى لسة
ما اكتمل
بكرة بدره محتمل...
محتمل مش مستحيل
**
البراءة اللى ف عينيها
لسة عايشة جوا قلب ولد وبنت صغيرّين
لساها مادة لهم إيديها المليانين
بالحنين
ماشية بتوزع ورود
ع المحتاجين
ماسكة أوووى ومتبتة بطرف الأمل
البعيد .. ومش بعيد
بتعاند الحزن العنيد
ياترى
بعد صيام الكاااام سنة
تلقى روح الفجر عيد ؟!
تلقى روح الفجر عيد ⚘
تعليقات
إرسال تعليق