جنين الحلم

بقلم . نجلاء الشنوانى                                     

جنين الحلم

تمرى ف بالى واتخيل

حياتى الجاية وياكى

وعقلى دايم التفكير

واخطط ع الزمان أحلامى..

 فى رحابك

وباتمنى أكون ناسك ف محرابك

وباطلع سلم الأسباب 

عشان اوصل لسقف الحلم

وأشبك إيدك الحلوة بخاتم ماس

وطوق ملفوف على رقبتك ..

 من الإحساس

وساعة تدق تعلننا ..

شريك وشريك

ونظرة ف عينك الخجلانة 

بتقولى حبيبي شاريك

بروحى افديك

ويجمعنا سكن للروح وللأبدان

وأكون فنان

يلون كل شيء فيكى بلون العشق

وبيدندن بألحانه حبيبته ترق

ويتحول قلم شاعر

 وينظم فيكى أشعاره

وينقش لك قصيدة شوق ..

على جداره

ويتغزل فى تفاصيلك 

ويحكيلك

ويرمى فى بيرك الكاتم

بأسراره

لكنه يفوق على صوتك بيهدم..

 كل ما اتخيل

وبيدق ف ناقوس الروح ...

ختام القصة والتفاصيل

بيعلن إن صار له بديل

مقدم عرض م الاسعار ...

 صحيح مغرى

وأجدع ريق عليه يجرى

وانا مضطرة أقتلك جنين الحلم

يا مر العلم وياكى

رخيص العمر ف لقاكى

وانا المصدوم

لكنك قبل ما تروحى بقولهالك

باعزى قلبك الهالك

ولا تظنى ان أنا المحروم

حبيبتى الدنيا دوارة

وهتدارى

فى قلب بيرضى بالمقسوم

خسارة اللوم