# صنعة _ روح

 

#هانى_آدم

نفسى أعمل حفلة توقيع

لديوان لسه انا ما كتبتوش

حرفه بينطق بالحريه

و عشق صبيه إسمها محروسه

خدها مزروع فيه ١٠٠ بوسه

و أنا في البوس مجرم و فظيع

أنا في البوس أستاذ تقطيع

منهجى عشق السطر البور

إللى عارفنى هييجى ينصفنى

واللي ما يعرفنيش معذور

أصلى معنديش شله تطبل

و لا وقت أحضرلكوا ندوات

و لا بطلعلكوا بث مباشر

و لا بأتنحنح للستات

قفل مصدي و عمره معدي

على أصنام

اللي بيصحي فيهم بينام

و الشعر مهوش صنعة إيدي

ده صنعة روح

موتها سكوتها و عشقها بوح

و البوح فى المطلق معذور

هأمضيلكوا لكن شرطي الدور

واحد واحد تقفوا طابور

الستات تيجي في الناحيادي

و الرجاله تستنى شويه

هأمضى بدمى و عز عليا

تقتلوا كلمة حق قايلها

و تصقفوا للبهلوانات

بكره هتفهموا قصدى يا إما

هأفهم أنا مغزى الإنصات