امسحيه من بين عينيكى ⚘
زهره مصطفى
*****
امسحيه من بين عينيكى ⚘
حتى لو غالى عليكى
غيرى الكحل القديم
غيرى رسمة عينيكى
واغسلى العتمة اللى ساكنة
فوق جفون شايله المرار
غيرى أحلام شرودك
وزعى للنور ورودك
واغزلى بحبال رموشك
ضحكة صافية
مستحيل راح تمشى حافية
وسط شوك الحزن تانى
ازرعى دربك أمانى
واطلعى من بين تلال الحزن
عودى سلسبيل فارد ضياه
وشوشى النجم اللى شارد
واترمى فـ حضن الحياة
اقطعى شريان أنينك
وانزفى الخوف من سنينك
واعشقى النور من جديد
وارسمى
فى كف الحياة
مليون طريق
لسة قلبك فيه غريق ؟
اللى باقى م اللى جاى
لسه عاوزة تحسبيه ؟؟
ذكريات العمر عدت
دمعة فى عيون حيرانين
تقدرى على الخوف تدوسى
تهزمى غدر السنين
*******
⚘
تعليقات
إرسال تعليق