مين لم بكى .. الشاعرة / ناديا فتوح
مين لم بكى ..
****
في سنين غرام راحت سدى
ضاع الهوى
و العمر عنقود من فراق يشحت لقا
ليه الحقيقة اتبدلت
و القلب باع في اﻷوردة
ف اياك تآمن للحنين وقت الجفا
إياك تصدق ضحكته
في القلب يزرع لك في شوك
ألوان ربيع تقلب خريف
و بصوت حفيف خفاش غرام
-زيف الشجر-
عاشق ظلام بيحاوط القلب الضعيف
مستني لحظة يكلبشك
و يرش أزهار الخداع في محبتك
مين اللي ضاع في الحضن ملقاش غير وداع
مين اللي قال إن اﻷمل محتاج لشوف
و الروح أسيرة بتنتفض معجونة خوف
و يامين يحوش لما البراءة بتتنهب
من وغد محروم الضمير
مين اللي خلى الحلم بور
مين اللي ينصف روح حزينة اتشتتت
مين بالنفاق ماشهدش زور
طب ليه بتأسر شوق جوارحك في الضياع
في قلوب جياع الحزن غارز مركبك
مين اشتري .. مين اللي باع
ليه من ذئاب توب البراءة بينجرح
و بيلضم الحلم ف عذاب
طب مين طلب فدية وطال من دنيته
طب حد لحظات الشروق طلب السماح
مين خد قرار ....
مين اشتكى .....
مين لم بكى .... ؟
طب حد قالك فز فوق
طب حد وصاك بالهدوء وبالهروب عدى وسبق
مين اللي داق طعم الفرح وقت العتاب
طب حد تاب .... ؟!
#ناديا_فتوح
من ديواني السادس " دمع الشجر "
تعليقات
إرسال تعليق